Sipas drejtorit të Dhomës së Tregtisë, Kushtrim Ahmeti, kjo situatë rrezikon funksionimin e bizneseve të dala në treg të hapur të energjisë, veçanërisht kompanitë prodhuese, të cilat nuk kanë hapësirë për rritje të çmimeve, pasi nuk janë konkurruese në tregjet ndërkombëtare.

Të dhënat e Agjencisë së Statistikave të Kosovës tregojnë se prodhimi i KEK-ut ka rënë për 57% në periudhën prill–korrik 2025, krahasuar me vitin e kaluar. Në të njëjtën kohë, importi i energjisë është rritur për 46%.

Eksperti i energjisë, Adhurim Haxhimusa, shpjegon se rënia e temperaturave rrit kërkesën për ngrohje, çka ndikon drejtpërsëdrejti në çmimet e rrymës në tregjet evropiane dhe, për rrjedhojë, edhe në Kosovë.

Çmimet e konsumit në vend kanë shënuar rritje këtë vit, me inflacionin që nga 1.5% në fillim të vitit ka arritur në 4.5% në gusht. Sipas njohësve të ekonomisë, në këtë ndikoi fillimisht rritja e tarifave të energjisë për konsumatorët e rregulluar, si dhe liberalizimi i tregut për bizneset me mbi 10 milionë euro qarkullim ose mbi 50 punonjës.