Statistikat tregojnë se 1 në 8 gra preken nga kanceri i gjirit, duke e bërë këtë sëmundje një nga sfidat më serioze shëndetësore për gratë në mbarë botën.

Në Kosovë, gjatë këtij viti, në Klinikën e Onkologjisë janë regjistruar mbi 300 raste të reja, përfshirë 3 meshkuj. Të dhënat e këtij viti nuk dallojnë shumë nga ato të vitit 2024.

Sipas drejtorit të Onkologjisë, Ilir Kurtishi, shumica e pacienteve diagnostikohen në stadin e parë dhe të dytë, gjë që e bën më të lehtë dhe më efektiv trajtimin.

“Është një shenjë e mirë që këtë vit, për 9 muaj kemi regjistruar rreth 320 deri 330 raste me kancer të gjirit, prej tyre 3 meshkuj. Numrat janë të njëjtë me vitin e kaluar, dhe pritet që fundi i vitit të na gjejë me rreth 450-460 raste në total,” – tha Kurtishi.

Muaji tetor shënon fushatën e ndërgjegjësimit për kancerin e gjirit, e cila synon të inkurajojë gratë dhe vajzat që të kryejnë kontrolle të rregullta mjekësore dhe vetëkontrolle, pasi diagnostikimi i hershëm është çelësi për shpëtimin e jetës.