Gjatë shfaqjes së saj të fundit të Radical Optimism Tour në Kia Forum, California, Dua Lipa surprizoi fansat duke ftuar Gwen Stefani, për një duet special të këngës “Don’t Speak.”

Para se ta prezantonte Stefani, Lipa ndau disa fjalë të sinqerta për ndikimin e saj:

“Dua të ndaj me ju një nga heronjtë e mi personal. Një nga artistet e mia të preferuara, që kam dëgjuar gjatë gjithë jetës sime.”
Kur prezantoi Stefani në skenë, Lipa i tha publikut:

“Kjo grua e jashtëzakonshme është këtu sonte. Dhe ju, L.A., jeni me fat – keni nderin të shihni Gwen Stefani-n!”

Dyshja performoi së bashku himnin e zemrës së thyer të No Doubt, “Don’t Speak”, ndërsa dy djemtë e Stefani-t, Kingston dhe Zuma, u panë duke shijuar momentin nga audienca.

Ky duet surprizë pasoi një tjetër moment të veçantë, kur Lipa solli në skenë legjendën Lionel Richie për të performuar hitin e tij klasik “All Night Long”.

Turneu i saj do të vazhdojë me shfaqje në San Francisco më 11 dhe 12 tetor, para se të përfundojë pjesën amerikane në Seattle më 15 dhe 16 tetor.