Një padi e përmasave të mëdha është ngritur kundër gjigantit farmaceutik Johnson & Johnson në Mbretërinë e Bashkuar, ku 3,000 persona pretendojnë se kompania ka shitur me vetëdije pudër për bebe të ndotur me azbest – një substancë e lidhur me kancerin.

Sipas dokumenteve të siguruara nga BBC, brenda kompanisë ekzistonin që në vitet ’60 memo dhe raporte shkencore që tregonin se pudra përmbante forma fibrore të talkut dhe minerale tremolite e actinolite, të cilat në formën e tyre fibrore klasifikohen si azbest.

Padia pretendon se Johnson & Johnson e dinte këtë fakt, por nuk paralajmëroi konsumatorët, duke vazhduar ta reklamojë produktin si “të pastër dhe të sigurt”, veçanërisht për foshnja dhe më vonë për gratë me ngjyrë në SHBA.

Kompania i ka mohuar akuzat, duke deklaruar se pudra “nuk përmbante azbest, ishte në përputhje me standardet rregullatore dhe nuk shkakton kancer.”
Shitja e pudrës me talk në Britani u ndalua në vitin 2023.

Sipas avokatëve, dëmet e mundshme mund të arrijnë në qindra miliona paund, duke e bërë këtë rastin më të madh të përgjegjësisë produktive në historinë britanike.

Shumë nga paditësit vuajnë nga kanceri ovarian ose mezotelioma, sëmundje që zakonisht lidhen me ekspozimin ndaj azbestit. Një prej tyre, Siobhan Ryan, tha për BBC:

“Ata e dinin që ishte e ndotur, dhe prapë e shitën për nëna dhe foshnja.”

Në SHBA, Johnson & Johnson është përballur me mijëra padi të ngjashme, disa prej të cilave kanë përfunduar me dënime prej miliarda dollarësh, megjithëse disa janë ankimuar me sukses.
Së fundmi, një gjykatë në Connecticut e urdhëroi kompaninë të paguajë 25 milionë dollarë një burri që kishte zhvilluar kancer pas përdorimit shumëvjeçar të pudrës.

Në qendër të gjithë kësaj qëndron një pyetje e rëndë:
Nëse kompania e dinte që produkti mund të ishte i rrezikshëm – pse vazhdoi ta shiste për dekada?