OpenAI lançoi shfletuesin “ChatGPT Atlas” për të sfiduar Google Chrome

Teknologji | 22.10.2025 Ora 7:59

OpenAI ka prezantuar zyrtarisht shfletuesin e ri të internetit me inteligjencë artificiale, ChatGPT Atlas, i cili synon të rivalizojë gjigantët si Google Chrome dhe Microsoft Edge.

Shfletuesi i ri, i ndërtuar rreth vetë ChatGPT-së, heq dorë nga shiriti tradicional i adresës dhe ofron një mënyrë më interaktive për kërkim dhe navigim.

Atlas është aktualisht i disponueshëm për sistemin operativ MacOS dhe përfshin edhe një “agent mode” për përdoruesit me abonim, që lejon ChatGPT-në të kërkojë automatikisht informacione në internet.

Lançimi i këtij produkti vjen në një kohë kur OpenAI po kërkon të zgjerojë ofertat komerciale të bazuara në inteligjencë artificiale dhe të përfitojë nga rritja e përdoruesve aktivë të ChatGPT-së, që tashmë kanë arritur në 800 milionë në javë.