Mallrat e huaja po vazhdojnë të mbizotërojnë tregun kosovar, ndërsa prodhimi vendor mbetet i pafuqishëm përballë konkurrencës së importit. Të dhënat e Agjencisë së Statistikave të Kosovës tregojnë se gjatë shtatorit 2024 eksportet arritën vlerën e 85.8 milionë eurove, ndërsa importet tejkaluan 606 milionë euro.

Krahasuar me periudhën e njëjtë të vitit të kaluar, importi është rritur për mbi 19%, thotë kryetari i Shoqatës së Prodhuesve, Kushtrim Ajvazi. Sipas tij, rritja e importit lidhet drejtpërdrejt me ngecjen e eksporteve.

“Një prej faktorëve kryesorë të rritjes së importit është mungesa e eksporteve, sepse trendi i eksportit nuk po ecën paralelisht me rritjen e importeve,” ka deklaruar Ajvazi.

Eksperti i ekonomisë, Ismet Mulaj, ndërkohë thotë se rritja e importit po vjen si pasojë e kostos së lartë të energjisë, shpenzimeve për ndërtimin e objekteve prodhuese dhe konkurrencës së padrejtë nga vendet e tjera. Ai thekson se prodhimi vendor mund të fuqizohet vetëm me politika më të qarta mbështetëse, financime të qëndrueshme dhe masa strukturore të përshtatshme.

Në mesin e produkteve që Kosova ka eksportuar më së shumti gjatë kësaj periudhe janë produktet minerale, pajisjet mekanike e elektrike si dhe ushqimet, pijet dhe duhani.