E ardhmja e Marc-André ter Stegen te Barcelona mbetet e pasigurt. Sipas gazetarit të njohur Fabrizio Romano, disa klube evropiane janë duke e monitoruar nga afër situatën e portierit gjerman, duke konsideruar një lëvizje të mundshme gjatë afatit kalimtar të janarit.

Ter Stegen nuk është më në planet kryesore të Barcelonës, ndërsa dëmtimet e shpeshta dhe mungesa e vazhdimësisë në formë kanë ndikuar që ai të humbasë rolin e titullarit. Edhe pse së fundmi është rikthyer në stërvitje pas dëmtimit në shpinë, drejtuesit e klubit katalanas mbeten të hapur për një shitje, në rast se paraqitet një ofertë e përshtatshme.

Romano ka konfirmuar se interesimi për shërbimet e Ter Stegen është real dhe se disa klube janë gati të veprojnë në javët e para të merkatos dimërore. Një transferim mund t’i japë portierit gjerman mundësinë për të rikthyer minutat e humbura dhe për të gjetur stabilitetin e nevojshëm para sfidave ndërkombëtare.

Në këtë kontekst ka reaguar edhe trajneri i përfaqësueses gjermane, Julian Nagelsmann, i cili ka mbështetur një largim të mundshëm nga Barcelona, duke theksuar se për Ter Stegen është e rëndësishme të luajë rregullisht në mënyrë që të mbetet në garë për një vend në Kombëtare për Kupën e Botës së ardhshme.

Megjithëse merkatoja e dimrit konsiderohet e vështirë për transferime të mëdha, veçanërisht për portierë të këtij niveli, interesimi i shtuar rreth Ter Stegen lë të kuptohet se një marrëveshje mund të konkretizohet. Javët e para të janarit pritet të sjellin zhvillime të rëndësishme, ndërsa e ardhmja e tij mbetet një nga temat më të nxehta të tregut të transferimeve.