Amazon ka njoftuar largimin nga puna të rreth 16 mijë punonjësve, si pjesë e një ristrukturimi të gjerë që synon rritjen e efikasitetit dhe përshpejtimin e vendimmarrjes në epokën e inteligjencës artificiale. Kjo është vala e dytë e shkurtimit të vendeve të punës brenda tre muajve, pas largimit të 14 mijë punonjësve në muajin tetor.

Sipas kompanisë, masat synojnë reduktimin e burokracisë dhe forcimin e strukturës organizative, në mënyrë që Amazon të mbetet konkurruese përballë gjigantëve të tjerë teknologjikë si Microsoft, Google dhe Meta. Drejtuesit e kompanisë kanë theksuar se këto vendime lidhen me rritjen e efikasitetit dhe jo me uljen e kostove.

Punonjësve të prekur do t’u ofrohet periudhë për të aplikuar për pozita të tjera brenda Amazonit, ndërsa ata që nuk sistemohen do të përfitojnë pagesë largimi dhe benefite shtesë. Kompania ka bërë të ditur se do të vazhdojë punësimet strategjike në sektorët kyç për të ardhmen e saj, veçanërisht në fushën e inteligjencës artificiale.