Një studim i publikuar në revistën shkencore Nutrients ka zbuluar se më shumë se 70% e ushqimeve, pijeve dhe snack-eve për fëmijë nga 6 deri në 36 muaj në Shtetet e Bashkuara janë ultra të përpunuara dhe përmbajnë aditivë të lidhur me inflamacion dhe çrregullime të mikrobiomës së zorrëve.

Nga 651 produkte të analizuara, studiuesit identifikuan 105 aditivë të ndryshëm. Në 71% të produkteve, përbërësi kryesor nuk ishte frut apo perime, por një ose më shumë aditivë.

Studimi gjeti gjithashtu nivele të larta sheqeri në produktet ultra të përpunuara, veçanërisht në snack-et për bebe, ku sasia e sheqerit ishte deri në 2.5 herë më e lartë krahasuar me produktet më pak të përpunuara. Një pjesë e konsiderueshme e produkteve nuk përmbushnin udhëzimet ushqyese të Organizatës Botërore të Shëndetësisë për proteina, kalori dhe kripë.

Ekspertët theksojnë se ekspozimi i hershëm ndaj ushqimeve shumë të përpunuara mund të ndikojë në preferencat ushqimore të fëmijëve dhe në rrezikun për obezitet, diabet të tipit 2 dhe sëmundje kardiovaskulare në të ardhmen.

Organizatat e shëndetit publik bëjnë thirrje për rregullim më të fortë dhe transparencë më të madhe në etiketimin e produkteve për bebe, ndërsa rekomandojnë që prindërit të zgjedhin ushqime sa më të freskëta dhe me përbërje të thjeshtë.