Google dhe Range Media Partners, në bashkëpunim me organizatën XPrize, kanë nisur një konkurs global për filma fantastiko-shkencorë me fond total prej 3.5 milionë dollarësh, që synon të promovojë histori optimiste për të ardhmen.

Konkursi është pjesë e iniciativës “100 Zeros” dhe synon të inkurajojë krijuesit të sjellin një perspektivë më shpresëdhënëse për të ardhmen, në një kohë kur industria e filmit po përballet me sfida të reja nga inteligjenca artificiale dhe teknologjitë e avancuara.

Fituesi i çmimit kryesor do të përfitojë 2.5 milionë dollarë financim për prodhimin e filmit, si dhe 100 mijë dollarë shpërblim në para, përveç mbështetjes kreative dhe teknologjike nga partnerët e projektit. Katër finalistë të tjerë do të marrin nga 100 mijë dollarë secili.

Për të aplikuar, regjisorët duhet të dorëzojnë një trailer ose film të shkurtër tre-minutësh, që paraqet një histori science-fiction me vizion pozitiv për të ardhmen. Pesë finalistët do të prezantojnë projektet e tyre në eventin Moonshot Gathering në Los Angeles gjatë muajit shtator.