Institucionet arsimore në kryeqytet theksojnë se po punojnë vazhdimisht për të krijuar kushte më të mira për këta fëmijë, duke ofruar hapësira të përshtatshme dhe mbështetje profesionale për zhvillimin e tyre.

Drejtoresha e shkollës “Mitrush Kuteli”, Remzie Kosumi Rracaj, tha se synimi është që nxënësit me nevoja të veçanta të mbështeten në çdo formë të mundshme dhe të kenë mundësi të zhvillojnë potencialin e tyre në një mjedis të përshtatur.

Ndërkohë, drejtori i Drejtorisë Komunale të Arsimit në Prishtinë, Samir Shahini, theksoi se institucionet kanë obligim të sigurojnë kushtet e nevojshme si për nxënësit ashtu edhe për stafin që punon me ta, përfshirë mësimdhënësit, asistentët dhe psikologët.

Qendrat burimore konsiderohen ndër hapësirat më të përshtatshme për zhvillimin dhe integrimin e fëmijëve me nevoja të veçanta, ndërsa bashkëpunimi mes institucioneve arsimore, komunës dhe prindërve vlerësohet kyç për përfshirjen e tyre të plotë në shoqëri.