Federata e Golfit e Kosovës ka njoftuar tërheqjen nga Kampionati Evropian i Seniorëve 2026 në Paphos të Qipros, pavarësisht se kishte siguruar kualifikimin dhe kishte përfunduar të gjitha përgatitjet. Sipas federatës, vendimi erdhi pasi autoritetet qipriote nuk lejuan që Kosova të përfaqësohej me flamurin dhe simbolet e saj shtetërore në mënyrë të barabartë me vendet e tjera pjesëmarrëse. Golfisti Azer Bislimaj ishte kualifikuar për herë të dytë radhazi në këtë kampionat dhe kishte zhvilluar muaj të tërë përgatitjesh intensive. Federata theksoi se sporti duhet të bazohet në barazi dhe respekt, duke shtuar se Kosova nuk kërkonte trajtim të veçantë, por vetëm të njëjtat të drejta që gëzojnë të gjitha shtetet pjesëmarrëse.