Italia po përballet me një valë ekstreme të të nxehtit që ka shkaktuar edhe viktima.

Të mërkurën, katër persona humbën jetën si pasojë e temperaturave shumë të larta që kanë përfshirë vendin. Sipas raportimeve të agjencisë shtetërore ANSA, viktimat përfshijnë dy fermerë në veri të Italisë, një person të pastrehë në Napoli dhe një burrë në rajonin e Lombardisë.

Autoritetet italiane kanë shpallur alarme të kuqe për 17 qytete për të enjten, niveli më i lartë i paralajmërimit për nxehtësi, që sinjalizon rrezik serioz për shëndetin.

Sipas autoriteteve shëndetësore, këto temperatura ekstreme mund të jenë të rrezikshme jo vetëm për personat e moshuar apo me sëmundje kronike, por edhe për njerëz të shëndetshëm.

Italia është ndër vendet evropiane që po përjeton temperatura të pazakonta që në fillim të sezonit veror, ndërsa autoritetet po u bëjnë thirrje qytetarëve të shmangin ekspozimin në diell gjatë orëve më të nxehta.