Tajfuni “Dolphin” ka goditur pjesën lindore të Kinës, duke detyruar autoritetet të evakuojnë më shumë se 1 milion persona, përfshirë banorë të Shangait dhe qyteteve përreth.

Stuhia arriti në tokë në provincën Zhejiang me erëra deri në 150 km/h, ndërsa më pas goditi edhe qytetin Wenzhou. Për shkak të motit ekstrem, vetëm në Shangai u anuluan rreth 1,400 fluturime, ndërsa u ndërprenë edhe shërbime të tjera të transportit.

Autoritetet kineze kishin lëshuar më herët alarmin më të lartë të kuq për tajfunin, por të hënën në mëngjes niveli i tij u ul në stuhi tropikale. Megjithatë, paralajmërimet për reshje të dendura, përmbytje dhe rrëshqitje dheu mbeten në fuqi deri të mërkurën.

Në disa zona të Zhejiang priten deri në 500 milimetra reshje. Qindra mijëra banorë janë zhvendosur në qendra emergjente, ndërsa atraksione turistike, përfshirë pjesë të Disneyland-it në Shangai, janë mbyllur.

Tajfuni kishte sjellë më herët reshje të mëdha në Filipine, Tajvanin verior dhe Okinawa të Japonisë. Në Filipine janë raportuar tetë viktima, ndërsa në Okinawa pesë persona kanë pësuar lëndime të lehta.

Autoritetet kineze kanë paralajmëruar gjithashtu për përhapjen e videove të rreme të krijuara ose manipuluara me inteligjencë artificiale gjatë stuhisë.