Filmi i shumëpritur “Heat 2”, vazhdimi i thrillerit kriminal të Michael Mann, mund të sjellë Stephen Graham në rolin e Neil McCauley, personazhit që në filmin origjinal u luajt nga Robert De Niro.

De Niro, i pyetur për mundësinë që Graham ta zëvendësojë në rolin e Neil-it, tha se nuk di shumë për projektin, por e cilësoi aktorin si një zgjedhje të shkëlqyer. Aktori gjithashtu pranoi se ende nuk e ka lexuar romanin Heat 2, mbi të cilin do të bazohet filmi.

Sipas raportimeve, Leonardo DiCaprio pritet të luajë versionin e ri të Chris Shiherlis, ndërsa Christian Bale do të marrë rolin e Vincent Hanna-s, personazhe të interpretuara më parë nga Val Kilmer dhe Al Pacino.

Filmi do të trajtojë edhe periudhën e hershme të personazheve, përpara ngjarjeve të filmit të vitit 1995. Regjisori Michael Mann pritet ta nisë xhirimin në nëntor 2026, me një buxhet të raportuar prej rreth 170 milionë dollarësh.