Noah Schnapp, i njohur për rolin e Will Byers në serialin “Stranger Things”, ka siguruar rolin e tij të parë në një film pas përfundimit të serialit.

Aktori do të jetë protagonist në thrillerin “Stealing From Pablo”, ku do të luajë përkrah David Mazouz dhe aktorit brazilian Seu Jorge.

Filmi, i frymëzuar nga ngjarje të vërteta të viteve ’80, tregon historinë e dy adoleshentëve që hyjnë fshehurazi në një rezidencë të braktisur në Florida për të bërë skateboarding. Por ata zbulojnë se shtëpia i përket trafikantit të njohur të drogës, Pablo Escobar, dhe përfshihen në botën e tij kriminale.

Ky do të jetë një rol krejt ndryshe për Schnapp, pas gati një dekade si Will Byers në “Stranger Things”. Aktori do të jetë gjithashtu producent ekzekutiv i filmit.

Ndërkohë, Schnapp pritet të bëjë edhe debutimin e tij në skenë këtë muaj në Londër, para se të rikthehet në ekranin e madh me “Stealing From Pablo”.