Puna nga shtëpia mund të ketë ndikim negativ në mirëqenien mendore, veçanërisht te personat që jetojnë vetëm, sugjeron një studim i ri.

Sipas hulumtimit të publikuar në revistën Science, personat që jetojnë vetëm dhe punojnë në profesione që mund të kryhen nga distanca raportojnë më shumë shqetësim psikologjik dhe izolim social sesa ata që punojnë në ambiente fizike.

Studimi analizoi të dhëna nga më shumë se një dekadë dhe zbuloi se personat që jetojnë vetëm dhe kanë punë të përshtatshme për punë nga distanca kalojnë rreth 25 për qind të ditëve pa kontakt social, më shumë se dyfishi krahasuar me punëtorët në profesione që kërkojnë prezencë fizike.

Megjithatë, ekspertët theksojnë se kthimi në zyrë nuk është zgjidhje automatike. Edhe në një ambient pune mund të ndihesh i vetmuar nëse mungojnë marrëdhëniet e mira dhe ndjenja e përkatësisë.

Ekspertët rekomandojnë që personat që punojnë nga shtëpia të krijojnë më shumë mundësi për kontakt social gjatë ditës, qoftë përmes takimeve me miqtë, aktiviteteve jashtë shtëpisë apo edhe bisedave të shkurtra me njerëz të tjerë.