Alergjitë nuk janë domosdoshmërisht diçka që e kemi që nga fëmijëria. Sipas alergologëve, një person mund të zhvillojë një alergji të re në çdo moshë, edhe nëse më parë nuk ka pasur probleme të tilla.

Hulumtimet e fundit tregojnë se disa faktorë mund të ndikojnë në shfaqjen e alergjive të reja. Një prej tyre është COVID-19, i cili është lidhur me rritjen e rrezikut për rinit alergjik dhe astmë. Edhe infeksione të tjera virale mund të ndikojnë në sistemin imunitar.

Një tjetër faktor janë antibiotikët, të cilët mund të ndryshojnë mikrobiomën e zorrëve – bakteret që luajnë rol edhe në funksionimin e sistemit imunitar.

Ndryshimet hormonale mund të ndikojnë gjithashtu. Për shembull, gjatë shtatzënisë disa gra mund të përjetojnë përkeqësim të alergjive ekzistuese ose simptoma të ngjashme me alergjinë, ndërsa ndryshime të reja mund të shfaqen edhe gjatë menopauzës.

Një rast veçanërisht i pazakontë është alergjia ndaj mishit të kuq, e cila mund të zhvillohet pas pickimit nga një lloj rriqre. Sindroma, e njohur si alpha-gal, mund të shkaktojë urtikarie, ënjtje dhe probleme gastrointestinale.

Ekspertët theksojnë se një alergji e shfaqur më vonë në jetë mund të jetë e përkohshme ose e përhershme, varësisht nga shkaku. Aktualisht nuk ekziston një mënyrë e sigurt për ta zhdukur çdo alergji të re, por studiuesit po punojnë në trajtime dhe mënyra të reja për të kontrolluar reagimin e sistemit imunitar.