Ushqimet ultra të përpunuara janë lidhur në studime të ndryshme me probleme shëndetësore, përfshirë obezitetin, sëmundjet kardiovaskulare dhe diabetin e tipit 2. Por ekspertët theksojnë se kjo nuk do të thotë që çdo produkt i tillë është automatikisht i pashëndetshëm.

Dietologia britanike Maeve Hanan thotë se është krijuar një lloj “paniku” rreth ushqimeve ultra të përpunuara, sidomos për shkak të mesazheve që i ndajnë ushqimet në “të mira” dhe “të këqija”.

Sipas saj, më e rëndësishme është vlera ushqyese e ushqimit dhe mënyra se si ai konsumohet në kuadër të dietës së përgjithshme.

Edhe produkte si drithërat e mëngjesit apo nuggetat e pulës mund të jenë pjesë e një diete të balancuar. Nuggetat, për shembull, përmbajnë proteina, por zakonisht kanë më shumë yndyrë dhe kripë se mishi i freskët i pulës, ndaj rekomandohet konsumimi i tyre me masë.

Një nga mesazhet kryesore të eksperteve është se një ushqim i vetëm nuk e bën një dietë as të shëndetshme, as të pashëndetshme. Rëndësi ka ekuilibri në ushqyerje me kalimin e kohës.

Ekspertët gjithashtu theksojnë se nuk ka ende një konsensus të plotë shkencor se sa ndikojnë vetë proceset industriale në shëndet, përtej përmbajtjes së lartë të sheqerit, kripës, yndyrës dhe kalorive në shumë prej këtyre produkteve.

Prandaj, në vend që të frikësohemi nga çdo përbërës me emër të vështirë, këshilla është të fokusohemi te një dietë e larmishme, me fruta, perime, drithëra, proteina dhe ushqime të tjera me vlera ushqyese.