Ministrja e Mjedisit, Planifikimit Hapësinor dhe Infrastrukturës, Fitore Pacolli, ka prezantuar në Romë progresin e Kosovës në përafrimin e sektorit të ujit me standardet e Bashkimit Evropian.

Pacolli ka marrë pjesë në Tryezën e Nivelit të Lartë Ministror për ujin dhe përafrimin me direktivat e BE-së, në kuadër të Euro-Mediterranean Water Forum 2026.

Ajo tha se Kosova ka avancuar në reformat për sektorin e ujit, por theksoi nevojën që nga planifikimi dhe përgatitja e projekteve të kalohet në zbatim dhe investime konkrete.

Sipas Pacollit, prioritet mbetet forcimi i institucioneve, monitorimi dhe menaxhimi i ujërave, si dhe rritja e sigurisë ujore dhe përballimi i ndikimeve të ndryshimeve klimatike.

Ajo shtoi se bashkëpunimi rajonal dhe menaxhimi i ujërave ndërkufitare janë pjesë e rëndësishme e këtij procesi.