Filmi i ri i Tom Cruise, “Digger”, ka pasur një nisje shumë të dobët në kinema, duke arkëtuar rreth 20 milionë dollarë në mbarë botën gjatë fundjavës së parë.

Filmi, i drejtuar nga Alejandro G. Iñárritu, ka kushtuar rreth 160–180 milionë dollarë, çka e bën edhe më të vështirë rikuperimin e investimit.

Nga shuma e arkëtuar, rreth 8 milionë dollarë janë siguruar në SHBA, ndërsa 12 milionë në tregjet ndërkombëtare. Ky është debutimi më i dobët global i Tom Cruise që nga filmi “Lions for Lambs”, i publikuar në vitin 2007.

Sipas vlerësimeve të industrisë, “Digger” do të duhej të arrinte rreth 400–450 milionë dollarë në arkë për të dalë në pikën e barazimit. Me këtë nisje, një rezultat i tillë duket shumë i vështirë.

Filmi ka marrë gjithashtu reagime të përziera nga kritikët, me një vlerësim prej 51% në Rotten Tomatoes. Në kast, përveç Cruise, janë edhe Riz Ahmed, John Goodman, Sandra Hüller dhe Jesse Plemons.