Universi i ri i DC-së po përgatitet të sjellë në ekranin e madh personazhin Clayface, një nga kundërshtarët e njohur të Batmanit. Filmi horror, i cili do të jetë i dedikuar për publikun e rritur, pritet të dalë në kinema më 23 tetor 2026.

Aktori Tom Rhys Harries, i cili interpreton Matt Hagen, personazhin që shndërrohet në Clayface, e përshkruan atë si një keqbërës, edhe pse publiku mund të arrijë të kuptojë arsyet që e shtyjnë të veprojë në mënyra të caktuara.

Në një intervistë për ScreenRant, Harries tha se dëshiron që publiku të ndiejë njëfarë empatie për personazhin, por pa i justifikuar plotësisht veprimet e tij. Edhe aktorja Naomi Ackie, e cila luan Dr. Caitlyn Corr, u shpreh se mund të kuptojë motivet e Clayface, por vetëm deri në një pikë.

Filmi, me regji të James Watkins, është pjesë e kapitullit të parë të universit të ri kinematografik të DC-së, “Gods and Monsters”. Ende nuk është bërë e ditur nëse Clayface do të përballet me Batmanin në projektet e ardhshme.