Autoritetet në një nga qendrat urbane më të dendura të Filipineve kanë nisur një program shpërblimi për vrasjen mushkonjave në një përpjekje për të parandaluar përhapjen e sëmundjes së dengës, që përhapet nga këto insekte. Carlito Cernal, shefi i fshatit Barangay Addition Hills në Manila qendrore, ka njoftuar shpërblimin e një pesoje (më pak se dy cent amerikan) për çdo pesë mushkonja të kapura.

Ky program është krijuar pas një rritje të rastëve të dengës në këtë zonë, e cila ka shkaktuar vdekjen e dy studentëve në lagjen e zotit Cernal. Programi do të zgjasë të paktën një muaj dhe ka për qëllim të luftojë përhapjen e mushkonjave dhe larvave të tyre. Shpërblimi vlen për mushkonjat e ngordhura dhe të gjalla, si dhe për larvat e tyre, që do të asgjësohen me përdorimin e dritës ultravjollcë.

Pavarësisht mbështetjes për qëllimet e programit, shpërblimi ka shkaktuar reagime të shumta në mediat sociale, ku disa përdorues kanë bërë komente ironike, duke e quajtur "kultivimin" e mushkonjave. Ndërkohë, Departamenti i Shëndetësisë i Filipineve ka shprehur mbështetje për nismën, por nuk ka dhënë një koment të qartë nëse kjo është një metodë efektive për të luftuar përhapjen e dengës.

Cernal ka theksuar se, pavarësisht kritikave, shpërblimi është një masë e nevojshme për të mbështetur përpjekjet ekzistuese të pastrimit të rrugëve dhe parandalimit të akumulimit të ujit, i cili krijon kushte ideale për mushkonjat që mbartin sëmundjen.

Barangay Addition Hills është një zonë e populluar me rreth 70,000 banorë, dhe autoritetet lokale shëndetësore kanë regjistruar 44 raste të dengës në këtë komunitet gjatë periudhës së fundit të shpërthimit të infeksioneve.