Një grup miqsh ka vendosur të mos marrë pjesë në dasmën e një çifti pas një kërkese që e quajtën “ofenduese” – një tarifë hyrjeje prej 200 dollarësh për çdo të ftuar.

Historia u nda në forumin e famshëm "Wedding Shaming" në Reddit, ku një prej të ftuarve tregoi se çifti vendosi ta vendoste këtë tarifë pasi menduan se miqtë e tyre ishin "kurnacë". Arsyeja? Dhuratat që kishin marrë në një event paraprak, një "wedding shower", nuk ishin sipas pritshmërive të çiftit.

Grupi i përbërë nga 12 persona, miq për më shumë se 8 vjet, ishte i papërvojë me dasma dhe kërkoi udhëzime për dhuratat. Çifti u përgjigj në mënyrë të paqartë se “do preferonin para, por çdo gjë vlerësohet.” Për “shower”-in sollën dhurata simbolike si vera, lule dhe kartele – gjithsej rreth 15 dollarë për person – dhe planifikonin të sillnin para cash për dasmën, duke përmendur shuma si 100 dollarë për person.

Por një ditë pas eventit, çifti u dërgoi një mesazh duke u kërkuar 200 dollarë për pjesëmarrje në dasmë – një shumë që nuk përfshinte as pijet. Kjo nuk ishte përmendur në ftesën e dasmës, e cila vetëm thoshte se dhuratat në para janë të mirëpritura.

Grupi refuzoi, duke e konsideruar tarifën jo vetëm të paarsyeshme, por edhe ofenduese – veçanërisht sepse po e planifikonin dhe paguanin beqarinë e nuses dhe kishin një kod veshjeje shumë strikt “black tie”.

Më pas, çifti i bllokoi të gjithë nga telefoni dhe u largua nga grupi i përbashkët në chat.

Komentuesit në Reddit u hodhën në mbrojtje të miqve, duke e quajtur çiftin “lakmitar”, “të cekët” dhe “të turpshëm”. Një komentues madje pyeti: “A ishin duke u përpjekur të fitonin para duke u martuar?” Dhe sinqerisht... tingëllon si një startup dasmor, jo si një martesë.