Lewis Pugh, atleti britaniko-jugafrikan i qëndrueshmërisë, është bërë njeriu i parë që ka përfunduar një not rreth ishullit Martha’s Vineyard në SHBA, duke përshkruar një distancë prej 97 kilometrash për 12 ditë rresht. Me këtë sfidë të jashtëzakonshme, Pugh synon të ndryshojë perceptimin e publikut për peshkaqenët, të cilët prej dekadash janë stigmatizuar si të rrezikshëm dhe të pamëshirshëm, kryesisht pas publikimit të filmit të famshëm “Jaws”, që këtë vit shënon 50-vjetorin.

Pugh notoi në ujë të ftohtë prej 8 gradësh Celsius, i shoqëruar nga një ekip sigurie me varkë dhe kajak, të pajisur me teknologji që largon peshkaqenët në mënyrë të sigurtë. Edhe pse nuk pati takime me peshkaqenë gjatë notit, ai u ndesh me sfida të mëdha, duke përfshirë motin e keq, erërat e forta dhe valët e mëdha.

Pugh theksoi se çdo ditë që kalonte në këtë sfidë e bënte të reflektonte më shumë mbi rëndësinë e ruajtjes së jetës detare. Ai e cilësoi vrasjen e peshkaqenëve si një “ekocid”, duke theksuar se mbi 100 milion peshkaqenë vriten çdo vit globalisht, një shifër alarmante që rrezikon ekosistemin e oqeaneve.

Pas përfundimit të notit, Pugh do të vazhdojë me fushatën e tij për të ngritur ndërgjegjësimin mbi rëndësinë e mbrojtjes së peshkaqenëve, me qëllim që të arrijë deri tek vendimmarrësit dhe të ndikojë në politikat për mbrojtjen e jetës detare. Ai planifikon të zhvillojë intervista në New York, për të shpalosur mesazhin e tij për publikun dhe për të vazhduar përpjekjet e tij në mbrojtje të natyrës.