Komisioni Evropian ka prezantuar një propozim ambicioz për buxhetin e ardhshëm shumëvjeçar të Bashkimit Evropian për periudhën 2028–2034, me një total prej 2 trilionë eurosh.

Komisioneri për buxhetin, Piotr Serafin, gjatë prezantimit para komisionit për buxhetin të Parlamentit Evropian, deklaroi se buxheti është ndarë në tre funksione kryesore: mbështetjen për shtetet anëtare, ndihmën për përfituesit dhe bizneset përmes fondit të konkurrueshmërisë, si dhe përkrahjen për partnerët globalë.

Presidentja e Komisionit, Ursula von der Leyen, vlerësoi se ky është një buxhet që përputhet me ambicien e BE-së dhe sfidat me të cilat përballet Evropa. Ajo theksoi 865 miliardë euro për planet e partneritetit kombëtar e rajonal, 300 miliardë euro për bujqësinë, si dhe trefishimin e investimeve në menaxhimin e migracionit dhe kufijve.

Po ashtu, janë planifikuar 100 miliardë euro ndihmë për Ukrainën.

Gjatë prezantimit, Serafin lëshoi edhe një paralajmërim të drejtpërdrejtë ndaj Hungarisë, duke theksuar se “nuk ka para të BE-së pa respekt për sundimin e ligjit”.

Ky propozim pritet të jetë subjekt i diskutimeve të gjera dhe negociatave mes institucioneve të BE-së dhe shteteve anëtare në muajt në vijim.