Një studim i fundit i publikuar në Journal of Human Development and Capabilities ka zbuluar se përdorimi i telefonave të mençur nga fëmijët nën moshën 13 vjeç ndërlidhet me pasoja të rënda për shëndetin mendor.

Fëmijët që përdorin smartphone në këtë moshë kanë më shumë gjasa të përballen me mendime vetëvrasëse, mungesë vetëvlerësimi, çrregullim emocional dhe shkëputje nga realiteti – me efekt më të theksuar te vajzat. Për çdo vit më herët që fëmija pajiset me një smartphone, mirëqenia e tij mendore bie në mënyrë të ndjeshme, sipas të dhënave të mbledhura nga 2 milionë njerëz në 163 vende.

Autorja kryesore e studimit, dr. Tara Thiagarajan, bën thirrje për kufizime globale në përdorimin e telefonave dhe rrjeteve sociale për fëmijët nën 13 vjeç. Ajo thekson se prindërit nuk mund ta përballojnë këtë sfidë vetëm, por duhet të ketë politika të përbashkëta shkollore dhe qasje komunitare për të mbrojtur fëmijët.

Ekspertët sugjerojnë që rrjetet sociale të mos përdoren para moshës 16 vjeç dhe inkurajojnë prindërit të bashkëpunojnë me njëri-tjetrin për vendime kolektive. Grupi “Wait Until 8th” ofron një marrëveshje të tillë për prindërit që duan të presin deri në fund të klasës së tetë për pajisje digjitale.

Nëse fëmija juaj tashmë ka një smartphone, nuk është vonë për të ndryshuar qasje. Ekspertët rekomandojnë biseda të hapura, kufizime digjitale dhe, kur është e nevojshme, ndihmë profesionale.