E ardhmja e Gianluigi Donnarummas tek Paris Saint-Germain duket se ka marrë fund. Portieri italian është lënë jashtë planeve të klubit për ndeshjet e para të sezonit, një sinjal i qartë se marrëdhënia mes tij dhe PSG-së ka arritur në pikën e ndarjes. Mediat sportive në Francë e Angli raportojnë se Manchester City është shumë pranë të bërit realitet një marrëveshje për transferimin e tij, ndërsa Fabrizio Romano thekson se largimi i gardianit është i pashmangshëm dhe vetëm klubi i duhur pritet ta përfundojë këtë histori.

Situata lidhet edhe me të ardhmen e Edersonit, i cili është objekt i interesimit nga Galatasaray dhe ekipe të tjera evropiane. Nëse transferimi i brazilianit konkretizohet, atëherë Donnarumma shihet si pasuesi ideal për portën e kampionëve të Premier League. Raportimet e fundit nga Anglia dhe Italia bëjnë me dije se City ka arritur një marrëveshje paraprake me PSG-në, me një shifër që mund të lëvizë mes 40 dhe 50 milionë eurove, ndërsa priten vetëm detajet e fundit të kontratës personale të lojtarit.

Donnarumma, nga ana e tij, ka shprehur zhgënjimin për mënyrën si është trajtuar në Paris, por ka falënderuar publikisht tifozët për mbështetjen gjatë këtyre viteve. Për italianin 26-vjeçar, kalimi në “Etihad Stadium” do të ishte një hap i madh në karrierë dhe një mundësi për të rikonfirmuar veten si një nga portierët më të mirë në botë, tashmë në një prej skuadrave më të forta të futbollit evropian.