Krijuesi i sagës Star Wars, George Lucas, ka njoftuar një ekspozitë të re të madhe të titulluar “Star Wars in Motion”, e cila do të jetë pjesë e muzeut të tij “Lucas Museum of Narrative Art”, që hapet më 22 shtator 2026 në Los Angeles.

Ekspozita do të përfshijë kostume, objekte origjinale, ilustrime dhe dizajne të automjeteve nga trilogjia origjinale dhe ajo prequel e Star Wars-it. Ajo synon të tregojë procesin krijues dhe zhvillimin vizual të një prej sagave më të njohura në historinë e kinemasë.

Muzeu, i cili do të përmbajë mbi 1,200 objekte në hapje, do të fokusohet në narrativën vizuale dhe evolucionin e artit përmes periudhave të ndryshme historike, duke përfshirë edhe filmin, komiket dhe artin klasik.

“Star Wars in Motion” është një nga ekspozitat inauguruese të këtij muzeu, i cili pritet të bëhet një nga qendrat më të rëndësishme të artit narrativ në SHBA.