Përmes një njoftimi në rrjetet sociale, Rama tha se projekti synon të lehtësojë lëvizjen e automjeteve dhe të krijojë qasje më të shpejtë për qytetarët në këtë zonë të qytetit.

“Po hapim një lidhje të re nga rruga ‘Agim Ramadani’ drejt rrugës ‘Bajram Kelmendi’”, ka shkruar ai.

Sipas kreut të komunës, kjo ndërhyrje do të mundësojë lëvizje më të lehtë dhe më efikase për qytetarët, duke reduktuar kohën e udhëtimit dhe duke përmirësuar rrjedhën e trafikut.

“Më shkurt, më thjeshtë, më shpejt”, është shprehur Rama.

Ndërkohë, Komuna e Prishtinës ende nuk ka publikuar detaje shtesë lidhur me afatet e realizimit të projektit, koston apo karakteristikat teknike të lidhjes së re rrugore.

Ky projekt vjen në një periudhë kur kryeqyteti po përballet me fluks të shtuar të automjeteve dhe sfida të vazhdueshme në menaxhimin e trafikut urban.