Evropa po përballet me një nga valët më intensive të të nxehtit të viteve të fundit, ndërsa Organizata Botërore e Shëndetësisë (OBSH) paralajmëron se temperaturat ekstreme mund të kenë shkaktuar mbi 1,300 vdekje të tepërta që nga 21 qershori.

Temperaturat rekord vazhdojnë të thyhen në shumë vende të kontinentit, përfshirë Gjermaninë, Poloninë dhe Republikën Çeke, ndërsa vala e nxehtësisë po zhvendoset drejt lindjes së Evropës.

Drejtori i Përgjithshëm i OBSH-së, Tedros Adhanom Ghebreyesus, tha se stresi nga nxehtësia mbetet një nga rreziqet më të mëdha për shëndetin publik, duke e cilësuar atë si një "vrasës të heshtur".

"Stresi nga nxehtësia shpesh quhet 'vrasësi i heshtur', ndërsa shtëpitë, vendet e punës dhe shkollat evropiane nuk janë ndërtuar për temperatura kaq të larta", u shpreh ai në një postim në rrjetin social X.

Ndërkohë, Ministria e Shëndetësisë e Francës njoftoi se që nga e mërkura janë regjistruar rreth 1,000 vdekje më shumë se zakonisht. Sipas autoriteteve franceze, shumica e viktimave janë persona mbi moshën 65-vjeçare, ndërsa është vërejtur edhe një rritje prej 40 për qind e vdekjeve në banesa.

OBSH paralajmëron se Evropa është kontinenti që po ngrohet më shpejt në botë, me një ritëm dy herë më të lartë se mesatarja globale.

Sipas organizatës, miliona qytetarë aktualisht po përballen me temperatura ekstreme, ndërsa në disa vende janë mbyllur shkolla, janë raportuar probleme në rrjetet elektrike dhe autoritetet vazhdojnë të bëjnë thirrje për kujdes të shtuar, veçanërisht për grupet më të rrezikuara të popullsisë.