Veshjet me mbrojtje nga rrezet ultravioletë, të njohura si UPF, po bëhen gjithnjë e më të popullarizuara, veçanërisht në SHBA, ndërsa temperaturat e verës po rriten dhe kujdesi ndaj lëkurës po merr më shumë rëndësi.

Këto veshje përfshijnë bluza, kapele, maska për fytyrën, doreza dhe veshje të tjera që janë krijuar për të kufizuar ekspozimin ndaj rrezeve UV. Një vlerësim UPF 50+ nënkupton se pëlhura bllokon të paktën 98% të rrezatimit UV.

Veshjet mbrojtëse nuk janë të reja. Ato janë përdorur prej vitesh nga notarët, sportistët, punëtorët që qëndrojnë gjatë në diell dhe fëmijët. Por tash ato po kalojnë edhe në botën e modës.

Kërkesa për këto produkte është rritur ndjeshëm në SHBA. Markat e modës dhe veshjeve sportive po shtojnë gjithnjë e më shumë produkte me mbrojtje UV në koleksionet e tyre verore.

Ekspertët thonë se ndryshimet klimatike dhe ndërgjegjësimi më i madh për shëndetin e lëkurës mund ta bëjnë mbrojtjen nga dielli pjesë të përditshme të veshjes, jo vetëm diçka që përdoret gjatë pushimeve.

Megjithatë, konsumatorët këshillohen të kontrollojnë pretendimet e prodhuesve, pasi jo çdo produkt që reklamohet si “mbrojtës ndaj UV” ka të njëjtin nivel të certifikuar mbrojtjeje.