Industria e aviacionit po përballet me një problem të pazakontë: disa nga ulëset më luksoze në avionë janë gati, por pasagjerët nuk mund t’i përdorin ende.

Shkak janë procedurat e gjata të certifikimit dhe testet e sigurisë për ulëset moderne të klasës së biznesit. Ato tashmë ngjajnë më shumë me mini-suita, me dyer për privatësi, krevate që shtrihen plotësisht, ekrane të mëdha dhe sisteme të kontrollit të temperaturës.

Rasti më i fundit është KLM, e cila pritet të përdorë avionët Airbus A350 në linjën Amsterdam–Toronto. Në disa prej tyre, 34 suita të klasës së biznesit mund të mbeten të mbyllura gjatë fluturimit, nëse nuk marrin në kohë miratimin e autoriteteve evropiane të sigurisë.

Problemi nuk është vetëm te KLM. Edhe kompani të mëdha si American Airlines, Lufthansa, Riyadh Air dhe Singapore Airlines po përballen me vonesa në certifikimin e kabinave të reja.

Ekspertët thonë se certifikimi i një ulëseje moderne mund të zgjasë të paktën gjashtë muaj më shumë se para pandemisë, ndërsa procesi i plotë nga dizajni deri te miratimi mund të zgjasë rreth tre vjet.

Sa më shumë privatësi, mure, pajisje dhe teknologji të shtohen në kabinë, aq më shumë teste sigurie kërkohen.