Gjiganti amerikan i shitjeve me pakicë Target ka përfituar rreth 994 milionë dollarë nga rimbursimet e tarifave doganore të paguara ndaj qeverisë amerikane.

Rimbursimi ka ndikuar drejtpërdrejt në rezultatet financiare të kompanisë. Fitimi operativ i Target në tremujorin e dytë u dyfishua, duke arritur në 2.6 miliardë dollarë, krahasuar me 1.3 miliardë dollarë në të njëjtën periudhë të vitit të kaluar.

Target është një nga kompanitë që po merr mbrapsht shuma të mëdha të paguara për tarifat e importit, pasi Gjykata Supreme e SHBA-së vendosi se një pjesë e tarifave të vendosura më herët nga administrata e Donald Trump ishin të paligjshme.

Administrata amerikane, megjithatë, ka vazhduar të vendosë tarifa të reja përmes mekanizmave të tjerë ligjorë. Ekonomistët paralajmërojnë se këto tarifa mund të rrisin çmimet për konsumatorët, pasi kompanitë shpesh ia bartin kostot shtesë blerësve.

Target, e cila importon një pjesë të madhe të produkteve nga Kina, ka thënë se po përpiqet të ulë varësinë nga ky treg dhe gjatë vitit të fundit ka ulur çmimet për më shumë se 10 mijë produkte.

Edhe kompania e kozmetikës Estée Lauder raportoi një përfitim prej 38 milionë dollarësh nga rimbursimet e tarifave, ndërsa aksionet e saj u rritën rreth 17% pas rezultateve më të mira se pritjet.