Kina ka vendosur të investojë rreth 360 miliardë juanë, ose afërsisht 53.6 miliardë dollarë, në tetë banka dhe kompani shtetërore të sigurimeve, në përpjekje për të mbështetur sistemin financiar dhe ekonominë në ngadalësim.

Sipas agjencisë shtetërore të lajmeve Xinhua, fondet do të ndihmojnë institucionet financiare të rrisin aftësinë për menaxhimin e rreziqeve dhe për të mbështetur ekonominë reale përmes kredive dhe investimeve.

Ky vendim vjen në një kohë kur ekonomia kineze po përballet me disa sfida, përfshirë tensionet tregtare me Perëndimin, krizën e zgjatur në tregun e pasurive të paluajtshme, plakjen e popullsisë dhe konkurrencën teknologjike me SHBA-në.

Ndër institucionet që do të përfitojnë nga kjo paketë janë disa nga bankat më të mëdha të Kinës, si Banka Industriale dhe Komerciale e Kinës dhe Banka Bujqësore e Kinës.

Rritja ekonomike e Kinës është ngadalësuar gjatë muajve të fundit. Në tremujorin e dytë të vitit, ekonomia u rrit me 4.3 për qind, nën objektivin vjetor të vendosur nga Pekini.

Qeveria kineze synon që përmes këtyre masave të rrisë stabilitetin financiar dhe të përballet me sfidat ekonomike të vendit.