Shakira dhe ish-partneri i saj, Gerard Piqué, janë paraqitur sërish në gjykatë në Barcelonë, këtë herë për të shqyrtuar mënyrën e organizimit të kujdesit dhe vizitave për dy djemtë e tyre, Milan dhe Sasha. Shakira, e cila jeton me fëmijët në Miami, kërkon ndryshimin e mënyrës së organizimit të udhëtimeve mes Shteteve të Bashkuara dhe Spanjës, duke propozuar që gjatë pushimeve të shkurtra të jetë Piqué ai që udhëton drejt Miami-t. Sipas përfaqësuesve të saj, qëllimi është të shmangen udhëtimet e shkurtra transatlantike dhe ndryshimet e shpeshta të zonës kohore për fëmijët, pa kufizuar kohën që ata kalojnë me babain. Palët kishin zhvilluar negociata, por nuk arritën një marrëveshje të re, ndaj tashmë pritet vendimi i gjykatës.