Personat që duan të rrisin kursimet e tyre pa rrezikuar shumë kapitalin mund të shqyrtojnë disa alternativa investimi, si aksionet që paguajnë dividendë, obligacionet dhe fondet e balancuara.

Sipas ekspertit financiar Douglas Boneparth, bashkëthemelues i kompanisë Bone Fide Wealth, ekzistojnë mundësi për të synuar kthime më të larta se 4 për qind, pa investuar të gjitha paratë në tregun e aksioneve. Megjithatë, asnjë investim nuk është plotësisht pa rrezik.

Ndër alternativat që ai sugjeron janë aksionet e kompanive të mëdha që paguajnë dividendë, të cilat mund të ofrojnë kthime vjetore prej 3 deri në 5 për qind ose më shumë, por vlera e tyre mund të bjerë. Një mundësi tjetër janë obligacionet me afate të ndryshme maturimi, të cilat mundësojnë planifikim më të mirë të kthimit të investimit.

Boneparth përmend edhe fondet e balancuara, të cilat kombinojnë aksionet me obligacionet. Sipas tij, këto fonde kanë historikisht kthime vjetore prej 5 deri në 7 për qind në periudha të gjata, por rezultatet e kaluara nuk garantojnë fitime të ardhshme.

Eksperti thekson se zgjedhja e investimit duhet të varet edhe nga koha kur personit do t’i nevojiten paratë. Sa më gjatë të mund të qëndrojnë paratë të investuara, aq më shumë mundësi ka për të përballuar luhatjet e tregut.

Ai rekomandon gjithashtu krijimin e një fondi emergjent që mbulon së paku tre muaj shpenzime jetese. Ky fond mund të ndihmojë në përballimin e shpenzimeve të papritura ose humbjes së të ardhurave, pa pasur nevojë për borxhe të reja.