Një studim me skaner të veshshëm tregoi se vetëm një orë mësimi mjafton për të ndryshuar ndjeshëm aktivitetin e trurit gjatë të nxënit të një instrumenti muzikor.

Studiuesit e Universitetit të Nottingham-it, me një skaner të ri të veshshëm të trurit, kanë zbuluar çfarë ndodh në tru kur dikush mëson të luajë violinë. Studimi, i publikuar në revistën Imaging Neuroscience, tregon se edhe një mësim i vetëm i ndryshon dukshëm modelet e aktivitetit të trurit.

Skaneri që mund të vihet si helmetë

Për studimin u përdor OPM-MEG, një skaner i ri i zhvilluar në Nottingham. Ai është i integruar në një helmetë të lehtë, me njësi kontrolli që mbahet në çantë shpine. Kjo i lejon shkencëtarët t’i matin sinjalet elektrike të trurit ndërsa personi kryen veprime natyrore.

Studiuesit matën valët e trurit, pra ndryshimet ritmike të aktivitetit elektrik në grupe neuronesh. Valët në frekuencën “beta” besohet se sinjalizojnë nëse veprimet tona sjellin rezultatin e pritur.

“Truri funksionon duke bërë parashikime. Nëse luaj violinë, truri pret një tingull të caktuar. Nëse luaj notën e pritur, ai merr informacion se rezultati përputhet me parashikimin. Nëse luaj një notë të papritur, merr informacion se nuk përputhet. Në këtë eksperiment i matëm këto sinjale në kohë reale”, tha Joe Gibson, studiues doktorature në Shkollën e Fizikës dhe Astronomisë.

Pjesëmarrësit me ndryshimet më të mëdha në valët beta para dhe pas mësimit shfaqën edhe përmirësimet më të mëdha në të luajturit.

Violinë pa asnjë pjesë metalike

Skaneri mat fusha magnetike shumë të vogla, prandaj instrumenti duhej të ishte plotësisht pa metal. Violinisti dhe prodhuesi i violinave nga Nottingham-i, Alan Kirby, mori një violinë standarde dhe i zëvendësoi të gjitha pjesët metalike me alternativa të bëra vetë. Rezultati ishte një instrument krejtësisht prej druri, që punon në frekuenca barok.

“Bashkimi i artit të lashtë të prodhimit të violinave me fizikën kuantike që qëndron pas këtij skaneri ka qenë i mrekullueshëm. Edhe më mbresëlënëse ishte të shihja efektet e mësimeve të mia në trurin e njerëzve”, tha Kirby.

Si u zhvillua eksperimenti

Në studim morën pjesë 22 fillestarë. Fillimisht shikuan një video ku Kirby luante melodinë “Twinkle Twinkle Little Star”. Më pas u zhvillua seanca e parë e skanimit, ku ata u përpoqën ta luanin të njëjtën melodi. Pasoi një mësim violine me Kirby, e më pas seanca e dytë e skanimit, identike me të parën.

Nga të nxënit motorik te sëmundjet e trurit

Profesor Matthew Brookes, që prej më shumë se 10 vjetësh drejton zhvillimin e OPM-MEG në Nottingham, tha se studimi kërkoi bashkimin e fizikës, inxhinierisë së dizajnit, matematikës dhe njohurive të Kirby-t si violinist e prodhues violinash.

“Rezultatet ndihmojnë të kuptojmë më mirë të nxënit motorik. Është interesante që disa nga efektet që matëm janë mes atyre që preken nga çrregullime si demenca. Shpresojmë që ky lloj studimi të sjellë një kuptim të ri jo vetëm për funksionin e shëndetshëm të trurit, por edhe për sëmundjet”, tha Brookes.

Burimi: Universiteti i Nottingham-it