Kryetari i Kryeqytetit, Përparim Rama, ka zhvilluar një takim të rëndësishëm në Odën e Kryeqytetit me Zëvendës-Shefen e Misionit në Ambasadën e SHBA-së në Kosovë, Anu Prattipati. Në qendër të diskutimit ishte rëndësia strategjike e bashkëpunimit mes Prishtinës dhe Shteteve të Bashkuara të Amerikës.

Gjatë takimit, znj. Prattipati e uroi kryetarin Rama për mandatin e ri dhe rikonfirmoi mbështetjen e palëkundur të SHBA-së për projektet zhvillimore dhe stabilitetin e Prishtinës.

Partneritet mbi vlera të përbashkëta Kryetari Rama vlerësoi lart rolin e SHBA-së, duke theksuar se ky partneritet shkon përtej marrëdhënieve institucionale.

“Bashkëpunimi me Shtetet e Bashkuara është një nga themelet kryesore mbi të cilat ndërtohet vizioni ynë për një Prishtinë të zhvilluar, të qëndrueshme dhe demokratike. Kjo aleancë është e ndërtuar mbi besimin reciprok dhe një vizion të përbashkët për të ardhmen e qytetarëve tanë,” ka deklaruar Rama.

Fokus në zhvillim dhe demokraci Palët u dakorduan se thellimi i marrëdhënieve do të vazhdojë me fokus të veçantë në forcimin e institucioneve demokratike dhe realizimin e projekteve konkrete që përmirësojnë jetën e qytetarëve të Kryeqytetit.