Qendra e Studentëve në Prishtinë ka njoftuar për ndryshime të përkohshme në shërbimet e mensës dhe orarin e konvikteve gjatë muajit të shenjtë të Ramazanit.

Sipas njoftimit, për syfyr do të ofrohen shujta të thata të paketuara, të cilat studentët mund t’i marrin çdo ditë gjatë orarit të drekës, në një linjë të veçantë ushqimi të dedikuar për këtë qëllim.

Ndërsa për iftar, për shkak të numrit të madh të studentëve, ushqimi do të jetë i disponueshëm edhe në formë të paketuar, duke u mundësuar studentëve ta marrin me vete dhe ta konsumojnë në dhomat e konvikteve, me qëllim të shmangies së mbingarkesës në hapësirat e brendshme.

Po ashtu, hyrje-daljet në konvikte do të lejohen nga ora 03:00 deri në përfundim të kohës së syfyrit. Ky ndryshim është i përkohshëm dhe pas përfundimit të Ramazanit do të rikthehet orari i mëparshëm.

Qendra e Studentëve ka falënderuar studentët për mirëkuptim dhe bashkëpunim, duke iu uruar muaj të mbarë dhe me shëndet.