Kryetari i Prishtinës, Përparim Rama, ka deklaruar se projekti i TRAM-it elektrik nuk do të financohet nga buxheti i Komunës.

Përmes një postimi në Facebook, ai ka theksuar se nuk ka nevojë të ndahet buxhet nga Kryeqyteti për këtë projekt, pasi ai po zhvillohet në bashkëpunim me sektorin privat.

Sipas tij, financimi do të realizohet përmes angazhimit të kapitalit privat, ndërsa këtë, siç ka shtuar, e kishte sqaruar edhe në ditën kur janë nënshkruar marrëveshjet me operatorët privatë.

Projekti i TRAM-it elektrik mbetet një nga iniciativat më të diskutuara në kryeqytet, ndërsa Komuna insiston se realizimi i tij nuk do të rëndojë mbi buxhetin publik.