Plakja e popullsisë në vendet e Ballkanit Perëndimor po shndërrohet në një nga sfidat më të mëdha sociale dhe ekonomike për vitet në vijim. Një raport i fundit i Banka Botërore thekson se kërkesa për shërbime të kujdesit afatgjatë është tashmë e lartë dhe pritet të rritet ndjeshëm.
Sipas raportit, rreth 16% e personave mbi 65 vjeç përballen me vështirësi të mëdha në aktivitetet bazë të përditshme, ndërsa 32% raportojnë vështirësi të moderuara. Aktualisht, të moshuarit përbëjnë nga 9% deri në 19% të popullsisë në vendet e rajonit.
Parashikimet tregojnë se në dekadën e ardhshme disa vende si Shqipëria, Bosnja dhe Hercegovina dhe Serbia do të klasifikohen si “super të plakura”, me mbi 20% të popullsisë mbi 65 vjeç. Deri në vitin 2050, edhe vende të tjera si Kosova, Mali i Zi dhe Maqedonia e Veriut pritet të ndjekin të njëjtin trend.
Megjithatë, mbulimi i shërbimeve formale të kujdesit afatgjatë mbetet i kufizuar. Sistemet publike vazhdojnë të mbështeten kryesisht në kujdesin rezidencial dhe në pagesa për kujdestarët informalë, ndërsa shërbimet në shtëpi dhe ato komunitare janë ende të pazhvilluara dhe shpesh varen nga donatorët ose organizatat joqeveritare.
Ky zhvillim rrit presionin mbi familjet dhe thekson nevojën për politika më të qëndrueshme dhe investime në sistemet e kujdesit social në rajon.
