Një ekip shkencëtarësh nga University of California, Santa Barbara ka zhvilluar një sistem inovativ që mund të ruajë energjinë e diellit për periudha shumë të gjata, madje edhe për vite.

Studimi u udhëhoq nga profesoresha e kimisë Grace Han, e cila u frymëzua nga mënyra se si dëmtohet ADN-ja e lëkurës nga rrezet e diellit. Shkencëtarët krijuan molekula speciale që ndryshojnë formë kur ekspozohen ndaj dritës dhe më pas lirojnë energjinë e ruajtur kur aktivizohen.

Teknologjia njihet si “Molecular Solar Thermal Energy Storage” dhe konsiderohet një alternativë premtuese për ruajtjen e energjisë pa emetime ndotëse.

Sipas studiuesve, sistemi arriti një densitet energjie prej 1.65 megaxhaul për kilogram, më i lartë se ai i baterive tradicionale lithium-ion që përdoren në telefonë dhe vetura elektrike.

Megjithatë, teknologjia është ende në fazë eksperimentale dhe kërkon përmirësime, pasi aktualisht aktivizohet nga rreze të forta ultraviolet dhe përdor substanca kimike korrozive për çlirimin e energjisë.

Shkencëtarët besojnë se në të ardhmen kjo teknologji mund të përdoret në dritare inteligjente apo sisteme ngrohjeje pa nevojë për djegie të karburanteve fosile.