Pyjet bregdetare të mangrovave në botë, të njohura për mbrojtjen e zonave nga stuhitë dhe për thithjen e sasive të mëdha të dioksidit të karbonit, po rikthehen më shumë se sa pritej, sipas një studimi të ri shkencor.

Për dekada me radhë, këto pyje ishin në rënie për shkak të prerjeve, zhvillimit urban dhe fermave të peshkut. Megjithatë, studiuesit thonë se që nga viti 2010, numri i mangrovave është rritur më shumë sesa është zvogëluar.

Sipas ekspertëve, rikuperimi është ndikuar nga mbrojtja më e fortë ligjore, ndërgjegjësimi publik pas fatkeqësive natyrore dhe aftësia e këtyre pyjeve për t’u rigjeneruar natyrshëm kur ndalet shkatërrimi i tyre.

Mangrovat luajnë rol të rëndësishëm në mbrojtjen e brigjeve nga valët e forta dhe stuhitë, ndërsa ruajnë edhe sasi të mëdha të karbonit, duke ndihmuar në luftimin e ndryshimeve klimatike.

Megjithatë, studiuesit paralajmërojnë se në disa rajone, si Afrika Perëndimore dhe Qendrore, dëmtimi i mangrovave mbetet ende problem serioz.