Rastet e ciklosporiazës, një infeksion parazitar që shkakton diarre të rëndë, janë rritur ndjeshëm në Shtetet e Bashkuara.

Sipas Qendrës për Kontrollin dhe Parandalimin e Sëmundjeve (CDC), janë konfirmuar 843 raste dhe 86 shtrime në spital që nga 1 maji, ndërsa numri real mund të jetë më i lartë pasi disa raste ende nuk janë përfshirë në statistikat kombëtare.

Burimi i shpërthimit nuk është identifikuar ende, por rastet e mëparshme janë lidhur shpesh me konsumimin e produkteve të freskëta si sallata, barishte dhe fruta të caktuara.

Simptomat kryesore të infeksionit janë diarreja e ujshme, dhimbjet e barkut, fryrja, humbja e oreksit dhe lodhja. Shenjat mund të shfaqen deri në dy javë pas infektimit.

Ekspertët këshillojnë larjen e mirë të frutave dhe perimeve, higjienën e duarve dhe ndjekjen e njoftimeve të autoriteteve shëndetësore. Infeksioni zakonisht trajtohet me medikamente të përshtatshme.