Fëmijët që shfaqin impulsivitet dhe hiperaktivitet në klasën e tretë kanë më shumë gjasa të përballen me vështirësi në mësime gjatë viteve të ardhshme dhe të kenë më pak mundësi për të përfunduar studimet universitare, tregon një studim i ri.

Hulumtimi, i udhëhequr nga studiues të Universitetit të Nju Jorkut (NYU), analizoi të dhënat e 747 fëmijëve, zhvillimin e të cilëve e ndoqi deri në moshën 26-vjeçare. Rezultatet treguan se nxënësit me nivele më të larta impulsiviteti dhe hiperaktiviteti kishin nota më të ulëta në matematikë dhe lexim, si në shkollën fillore ashtu edhe në arsimin e mesëm.

Në të kundërt, fëmijët që shfaqnin vetëkontroll më të mirë kishin rezultate më të larta në mësime dhe rreth 20 për qind më shumë gjasa për të përfunduar studimet universitare.

Studiuesit theksojnë se vetëkontrolli nuk është një tipar i pandryshueshëm, por një aftësi që mund të zhvillohet dhe forcohet. Sipas tyre, aktivitete si pushimet gjatë orarit mësimor dhe lojërat në ambient të hapur u japin fëmijëve mundësinë të çlirojnë energjinë e tepërt, gjë që mund të përmirësojë përqendrimin dhe suksesin e tyre në shkollë.//HealthyDay