Një studim i ri ngre shqetësime se trendet e bukurisë në rrjetet sociale mund të ndikojnë jo vetëm në produktet që blejnë adoleshentët, por edhe në ekspozimin e tyre ndaj kimikateve potencialisht të dëmshme.

Sipas hulumtimit, adoleshentët që ndjekin influencues të rrjeteve sociale me linja produktesh kozmetike përdorin rreth 30 për qind më shumë produkte të kujdesit personal, ndërsa ata që shikojnë tutoriale për flokët ose bukurinë përdorin rreth 40 për qind më shumë.

Studiuesit nga Rutgers School of Public Health anketuan 143 nxënës të shkollave të mesme për përdorimin e produkteve të kujdesit personal, duke përfshirë shamponët, deodorantët, produktet për lëkurën, parfumet dhe grimin.

Shqetësimi lidhet me faktin se disa prej këtyre produkteve mund të përmbajnë ftalate, parabene dhe fenole, substanca që janë lidhur me çrregullime hormonale dhe rreziqe të tjera shëndetësore, përfshirë potencialisht edhe rrezikun për kancer.

Vajzat raportuan përdorimin e një mesatareje prej 14 produkteve të kujdesit personal në ditë, rreth dy herë më shumë se djemtë.
Studiuesit theksojnë se adoleshenca mund të jetë një periudhë veçanërisht e ndjeshme ndaj ekspozimit ndaj kimikateve, pasi trupi dhe sistemi hormonal janë duke kaluar ndryshime të shpejta.

Pavarësisht kësaj, vetëm 19 për qind e adoleshentëve të përfshirë në studim thanë se lexojnë rregullisht listën e përbërësve në produktet që përdorin
.
Autorët e studimit sugjerojnë që kërkimet e ardhshme të përdorin edhe analiza të urinës për të matur më saktë nivelin e ekspozimit të adoleshentëve ndaj këtyre kimikateve.

Studimi është publikuar së fundmi në revistën shkencore Journal of Exposure Science & Environmental Epidemiology.