Reshjet e shiut, Policia paralajmëron shoferët

Vendi | 18.11.2025 Ora 8:43

Policia e Kosovës u ka bërë thirrje qytetarëve që të tregojnë kujdes gjatë vozitjes për shkak të reshjeve të shiut dhe rrugëve të mbuluara me ujë. Autoritetet theksojnë se ndryshimi i kushteve atmosferike kërkon vëmendje të shtuar në trafik, sidomos nga shoferët e automjeteve.

“Policia apelon për përshtatje të shpejtësisë me kushtet e rrugës, mbajtje të distancës mes mjeteve dhe ngadalësim gjatë lëvizjes në rrugë të mbuluara me ujë”, thuhet në komunikatë.

Shoferët këshillohen të jenë të kujdesshëm dhe të planifikojnë më shumë kohë për udhëtimet e tyre, duke siguruar kështu sigurinë e vetes dhe të të tjerëve në rrugë.