Ambasada e Shteteve të Bashkuara në Prishtinë, në bashkëpunim me Policinë e Kosovës, zhvillon sot një ushtrim të gjerë të menaxhimit të krizave, nga ora 15:00 deri në 21:00.

Ushtrimi fokusohet në koordinimin ndër-institucional dhe reagimin emergjent, si pjesë e përpjekjeve të përbashkëta për forcimin e bashkëpunimit në fushën e sigurisë. Ambasada thekson se aktivitetet janë vetëm trajnuese dhe nuk lidhen me ndonjë incident të vërtetë.

Gjatë ushtrimit pritet rritje e prezencës policore dhe e stafit të sigurisë së Ambasadës së SHBA-së në disa zona të Prishtinës, si dhe devijime të përkohshme të trafikut, përfshirë mbyllje të shkurtra të rrugëve dhe përdorim të sirenave apo mjeteve të tjera trajnuese.

Institucionet kërkojnë bashkëpunimin e qytetarëve dhe respektimin e udhëzimeve të Policisë së Kosovës gjatë kësaj periudhe.