Nga sot, 1 tetor 2026, hyn në zbatim të plotë Marrëveshja e Tregtisë së Lirë ndërmjet Kosovës dhe vendeve të EFTA-s: Zvicrës, Islandës, Norvegjisë dhe Lihtenshtajnit.

Me rastin e hyrjes në fuqi të marrëveshjes, sot pritet të niset edhe pakoja e parë drejt tregut EFTA, përmes pikës kufitare në Dheu të Bardhë, nga ora 13:00.

Marrëveshja synon të lehtësojë shkëmbimin tregtar dhe të krijojë rregulla më të qëndrueshme për bizneset e Kosovës dhe vendeve të EFTA-s. Ajo përfshin heqjen e barrierave tarifore dhe lehtësimin e tregtisë për produktet industriale dhe bujqësore të përpunuara.

Parashikohen gjithashtu procedura më të thjeshta për rregullat teknike, sanitare dhe fitosanitare, me qëllim reduktimin e pengesave në tregti.

Negociatat për marrëveshjen nisën në qershor të vitit 2022 dhe përfunduan në shtator 2024. Marrëveshja u nënshkrua zyrtarisht më 22 janar 2025.

Për zbatimin e saj janë përcaktuar edhe procedurat për dëshmitë e origjinës dhe deklarimin doganor të mallrave që plotësojnë kushtet për trajtim preferencial.